استطاع فيلم فاصل من اللحظات السعيدة، بطولة النجم هشام ماجد والفنانة هنا الزاهد، أن يحتل المركز الثالث في قائمة إيرادات شباك التذاكر، حيث حقق إيرادت بلغت 879 ألف جنية.

أبطال فيلم فاصل من اللحظات اللذيذة 

وفيلم فاصل من اللحظات اللذيذة الذي يرصده تحيا مصر من بطولة هشام ماجد، هنا الزاهد، محمد ثروت، بيومى فؤاد، والطفل جان رامز وآخرين، والعمل من تأليف شريف نجيب وإخراج أحمد الجندى وإنتاج أحمد السبكى.

تصريحات هشام ماجد 

من جانبه، قال هشام ماجد: وقت لما كنا بنعمل رجال لا تعرف المستحيل كنا بنهزر ومكنتش أتوقع إننا نوصل لكل ده، لأن عمري ما كان حلمي إني أكون ممثل، بس مع الوقت بتكتشف جواك مواهب مكنتش عارف إن هي عندك، وابتدينا في الجامعة نعمل رجال لا تعرف المستحيل وانتشر جدا وكنا بنعمل أفلام قصيرة، ومن فيلم للتاني حبينا الشغلانة وبدأنا نشتغل على نفسنا، وإحنا أول ناس تعمل السينما المستقلة بكاميرا فيديو.

مؤهل هشام ماجد 

وتابع: اتخرجت من هندسة وابتديت اشتغل مهندس ونسيت التمثيل شوية، لغاية ما جت فرصة في التانية وكنت بعمل الأفلام دي وأنا لسة في الهندسة، لغاية ما اكتشفت إن التمثيل هو الكارير بجد، والموضوع مش مجرد هزار، ده هيبقى أكل عيشي فعلا، فـ سبت هندسة وبدأت أركز في التأليف والتمثيل.

وأضاف: فيلم ورقة شفرة ده بعتبره ابني البكري، وفي العرض الخاص بتاعه، مكنتش مصدق إني شايف نفسي على شاشة كبيرة قدامي وبقول هي الناس دي بجد بتتفرج وبيضحكوا بجد ولا بينافقونا؟ وكان إحساس غريب لما الناس بدأت تسقف، فالفيلم ده كان أغلى فرحة عندنا في كل أفلامنا.

واستطرد: مُقل شوية في التأليف لـ غيري، عشان خلاص بقيت عايز أعمل حاجات لنفسي، فالتأليف لحد تاني بياخد وقت كتير ومجهود ذهني كتير، وبيبقى في تضارب مصالح، يعني ممكن أكون بكتب وألاقي إيفيه عجبني، أقول طب ما أنا اللي عايز أقول ده، فركزت مجهودي في التأليف لنفسي.

وأردف: أنا وأحمد فهمي كنا كاتبين جزء من فيلم بوشكاش قبل ما نعرف إن محمد سعد اللي هيعمله، فلما عرفت إننا هنعملهوله، فرحت فرحة غير عادية، أنا بحبه وهو قعدته حلوة، ودخلتله فيلم بوحة 3 مرات.

واستكمل: بس ساعتها محمد سعد قالنا الفيلم ده مش هيتكتب كدة، إحنا نطلع إسكندرية، وفعلا طلعنا وفضل كل يوم يجيبلنا سمك وجمبري ونقعد ناكل ونكتب وخلصنا الفيلم.

واختتم هشام ماجد حديثه قائلًا: بصور حاليًا فيلم اسمه فاصل من اللحظات اللذيذة، هو فيلم كوميدي من إخراج أحمد الجندي ومعايا هنا الزاهد وبيومي فؤاد ومحمد ثروت والطفل جان رامز، وأضاف هشام مازحًا: جان ده طفل في التلاتين من عمره.